استاد جعفرینین سچیلمیش اثرلری

[ishildaq]

اللهین آدی و یادینان

[ishildaq]

اوچور ایلهامیم او قوشلار کیمی کی

یاز وعده سینده

قووزانیر ماوی گؤیه تا اوجا باش بیر داغا قونسون

کؤرپه قارتال کیمی دیر

گاه چکیلیر گرزده ن ایتینجه ک

اگله نیر گاه ساوالان عشقینه – آغدان – آغاقونسون

هر اوجا داغ کی گؤرورسن باشی قاردلا آغاراندی

اورا بیل کی ساوالاندی

آمما یوخ !

هر اوجا داغ سسیمی السا دا تئز قئیته ره جکدی

سسی قئیته رمک همان یئل بیله جکدی

آخی یئل یولچودو گئتگین اوکی سؤز ساخلایا بیلمز

یئل سؤزو قاپدی قاچیردار اونو کیم هاخلایابیلمز

یئل گئدرگیندی پیچیللارسؤزوکوللار قولاغیندا

سؤزو قربان ائله یر قیرنادا قانقال آیاغیندا

چئویره ر سؤز چاناغیندا

جالایارداغلارا هر بیر سؤزو مین سؤز تؤره دندی

بیلمیرم سیرری ندندی

یئل گئده ر گیندی یئلی ساخلاماق اولماز

یئله بئل باغلاماق اولماز

آمما سن ای سؤزو سینه نده کؤزردن ساوالانیم

کیم گله صدقله زرتشت بئجردن ساوالانیم

ائلیمین شانلی داغی باشیوه مین لرجه دولانیم

اریدیب ائل غمی بیر یول سنی کؤکدن ده تالانسان

سئل اولوب قانلی دنیز لر کیمی دونیایه جالانسان

آدی دیللرده قالاناسان

ساوالانسان ، ساوالانسان

ساوالان ائل غمینی بللی دی ساخلار سینه سینده

سینه سی کؤزدو آلودور گیزیریک اینسی سی واردیر نفسینده

شاعرین غملی سه سینده آلگیلان ساخلاسن ای ائل داغی غملی قفسینده

ساوالان آلسادا هر سیرری سؤزو داغلارا سالماز

گؤره نامرد دوروبدور ساوالاندان سس اوجالماز

ساوالاندا تؤکولن داشلاری دیندیر دانیشاللار

سالسا عاشیق نفسین کوللارا آلیشاللار

ده ده قورقود سازی چالسا

ده لی دومرول باش اوجالدار

بلی البته کی یولداش باشینی یولداش اوجالدار

سسله عاشیق سازی چالسین

سسی میز بیرده اوجالسین

اویناماق لیز گی یه دؤنسون

کاس شوشم گوزگویه دؤنسون

قوی وئره ک سس سسه باهم اوخویاق بیر ده کوراوغلو دلی سیندن

هجرین قوچ نبی سیندن

اوکی ظالیملری مظلولارین اوستونده ازه ردی

او کی آسلان کیمی داغلاردا یاتیب باغدا گزه ردی

اوخو عاشق اوخو

سن بیل او کی تانری تانییبسان

سؤزومه دوز جالییبسان

سوموگوم قوی سازا گلسین

بولبولوم آوازا گلسین

یازمیشام ایوازا گلسین

گوچ آلاق قوی دلی لردن

باج آلاق اجنبی لردن

او کی بیلمیر نبی کیمدیر قویون آذرائلینی مسخره سانسین

بیر عؤمور دورکی فضولی نی – نسیمی نی دانیب ایندی ده دانسین

شهریار تک سن اوجالت باشیوی قوی عرشه دایانسین

قوی باخار کور تر ایچینده جوموبان اؤلسون – اوتانسین

اوکی آخساخدی یوبانسین

اوکی تورکون دیلین اسگیتمه گه تصویره سالیبدیر

اوکی تورکون بالاسین ایندی ده آشغالچی سانیبدیر

او تفاله بیلیرم فی***ینی طاغوتدان آ لیبدیر

او رژیمدندی قالیبدیر

یوخسا تورکون بالاسیندا ن چیخیب علامه ی دوران

اونا دونیا باش ا ییر فلسفه ده

بیر جه نه ایران

قوی دئییم شهریاریمدان

نیسگیل او چرچی یه قالسین کی جواهر نه دی ، قانمیر

فیکری آللاتما دادیر خالقی ،ائلین حالینه یانمیر

اریمیر ، اؤلمور ، اوتانمیر

آخی ای قاردا ، دوماندا باش اوجالدان ساوالانیم

غمی ، دونیا نی قوجالدان ساوالانیم

ائل بیلیر داغلار آرا هراوجا داغلار باشی سن سن

وئرسهنده الیوی قارداشیوین سیر داشی سن سن

وئر گیلن بیر لیک الین بیرده دماونده اونون یولداشی سن سن

اوندان آیریلما آماندی

یولوموز چمدی دوماندی

قوی ایگیدلر سیزه فخر ائیله ییبن باشان اوجالتسین

قویما قارتال دولانان یئر لره قوز غون الی چاتسین

ساوالان چنلی چاغیندا

منیم ایلهامیم اولارکن

کؤنلوم اؤز سرری سؤزون صدق ایله سؤیلر ساوالانه

ساوالان کؤز قالادار شاعر اولانلار سینه سینده

اوردا زرتشت گئیب تانریدان ایلهامین آلانه
اگیرم باش ساوالانه ، اگیرم باش ساوالانه


Savalan



Uçur ilhamım o quşlar kimi ki Yaz vədəsində
Qovzanır maavi göyə ta uca baş bir dağa qonsun
Körpə qartal kimidir
Gah cekilir gözdən itincək
Əylənir gah savalan eşqinə – ağdan- ağa qonsun
Hər uca dağ ki görürsən başı qarda ağarandır
Ora bil ki savalandır
Amma yox!
Hər uca dağ səsimi alsada tez qeytərəcəkdi
Səsi qeytərmək haman yel biləcəkdi
Axı yel yolçudu getgin
O ki söz saxlıya bilməz
Yel sözü qapdı qaçırdar onu kim haxlıya bilməz
Yel gedərgindi pıçıldar sözü kollar qulağında
Sözü qurbaan eliyər qırnada qanqal ayağinda
Çevirər söz çanağında
Calayar dağlara hər bir sözü min söz törədəndi
Bilmirəm sırrı nədəndi
Yel gedərgindi yeli saxlamağ olmaz
Yelə bel bel bağlamağ olmaz
Amma sən ey sözü sinə ndə közərdən savalanım
Sidqilə kim gələ zərtöşt becərdən savalanım
Elimin şanlı dağı başıva minlərcə dolanım
Əridib el qəmi bir yol səni kökdəndə talansan
Sel olub qanlı dənizlər kimi dünyayə calansan
Adı dillərdə qalansan
Savalan san, savalansan
Savalan el qəmini bəllidi saxlar sinəsində
Sinəsi közdü alovdu gizirik insisi vardır nəfəsində
Şaairin qəmli səsində
Algılan saxla sən ey el dağı qəmli qəfəsində
Savalan alsada hər sırrı sözü dağlara salmaz
Görə naməərd durubdu savalandan səs ucalmaz
Savalanda tökülən daşları dindir danışallar
Salsa aaşiq nəfəsin kollara kollar alışallar
Dədəqorqud1 sazı çalsa
Dəli dümrül2 baş ucaldar
Bəli əlbəttə ki yoldaş başını yoldaş ucaldar
Səslə aaşiq sazı çalsın
Səsimiz birdə ucalsın
Oynamax lizgiyə dönsün
Kas şüşəm güzgüyə dönsün
Qoy verək səs səsə bahəm oxuyax birdə koroğlu dəlisindən
Həcərin qoç nəbisindən
O ki zalimləri məzlumların üstündə əzərdi
O ki aslan kimi dağlarda yatıb bağda gəzərdi
Oxu aaşiq oxu
Sən bil o ki tanrı tanıyıbsan
Sözümə duz calıyıbsan
Sümügüm qoy saza gəlsin
Bülbülüm avaza gəlsin
Yazmişam eyyvaza gəlsin
Güc alax qoy dəlilərdən
Bac alag əcnəbilərdən
O ki bilmir nəbi kimdir
Goyün azər elini məsqərə sansın
Bir ömürdür ki fuzulini nəsimini danır indidə dansın
Şəhryar sən ucalt başıvı qoy ərşə dayansın
Qoy baxar kor tər içində cumuban ölsün utansın
O ki axsaxdı yubansın
O ki türkün dilin əsgitməyə təsvirə salıbdır
O ki türkün balasın indidə aşqalçı sanıbdır
O tüfalə bilirəm fikrini taağutdan alıbdı
O rejimdəndi qalıbdır
Yoxsa türkün balasından çıxıb əllameyi dövran
Ona dünya baş əyir Fəlsəfədə
Bircə nə İran
Qoy deyim şəhryarımdan
Nisgil o çərçiyə qalsın ki cəvahir nədi qanmır
Fikri aldatmadadır xalqı elin haalinə yanmır
Ərimir ölmür utanmır
Axı ey qarda dumanda baş ucaldan savalanım
Qəm-i dünyanı qocaldan savalanım
El bilir dağlar ara hər uca dağlar başı sənsən
Ver səhəndə əlivi qardaşıvın sır daşı sənsən
Vergilən birlik əlin birdə dəmavəndə onun yoldaşı sənsən
Ondan ayrılma amandı
Yolumuz çəndi dumandı
Qoy iyitlər sizə fəxr eyliyəbən başın ucaltsın
Qoyma qartal dolanan yerlərə qozqun əli çatsın
Savalan çənli çağında
Mənim ilhaamım olar kən
Könlüm öz sırrısözün sidqilə söylər savalanə
Savalan köz qaladar şaair olanlar sinəsində
Orda zərtöşt gedib tanrıdan ilhaamın alanə
Əyirəm baş savalanə- əyirəm baş savalanə


ustad huşäng cäfäri

[ishildaq]

«نسیمی» نین قانی یام

منه حقارتیلن باخمایین ، غزل کانی یام ،

واراق – واراق داغیلان ائلده ، شعر دیوانی یام ،

منیم ویقاریمی گئت ، چیلله خانه دن خبر آل ،

اخی فرج کیمی یم ، منده عشق سولطانی یام ،

یاشیل چمنده بیتن ، سینه داغلی بیر لا لایام ،

«فضولی» نغمه سی یم من ، «نسیمی» نین قانی یام ،

اولار کی عاشق دلخسته دیر ، تانیللا منی ،

بو اؤلکه ده اؤلن عاشیقلرین ، چیخان جانی یام ،

آری کیمی دولانین گوللر اوسته ، بار گتیرین ،

آنام دیلی شیره دیر ، من او شیره نین شانی یام ،

بو فخردیر منه تورکو ائلیمدی ، تورکو دیلیم ،

منم بسیمدی فقط ، سهروردینی تانی یام ،

بیر حقی باتمیش ائلین سینه داغلی شاعیری یم ،

غزلچی « جعفری » یم ، اؤلکه مین آدی سانی یام ،



NƏSİMİNİN QANIYAM

Mənə həqarət ilən baxmayın, qəzəl kanıyam,
Varaq-varaq dağılan eldə şeir divanıyam.
Mənim vüqarımı get çilləxanədən xəbər al,
Əxi Fərəc kimiyəm, mən də eşq sultanıyam.
Yaşıl çəməndə bitən sinə dağlı bir lalayam,
Füzuli nəğməsiyəm mən, Nəsiminin qanıyam.
Olar ki aşiqi-dilxəstədir, tanılla məni,
Bu ölkədə ölən aşiqlərin çıxan canıyam.
Arı kimi dolanın güllər üstə, bar gətirin,
Anam dili şirədir, mən o şirənin şanıyam.
Bu fəxrdir mənə türkü elimdi, türkü dilim,
Mənim bəsimdi fəqət Sührəvərdini tanıyam.
Bir həqqi batmış elin sinə dağlı şairiyəm,
Qəzəlçi Cəfəriyəm, ölkəmin adı-sanıyam