ديليم

[ishildaq]

ANA DİLİ

زبان مادری
آنا دیلی

ديل آچاندا ايلک دفعه « آنا » سؤيله ييريک بيز،
« آنا ديلي » آدلانير بيزيم ايلک درسليگيميز.
ايلک ماهنيميز لايلاني آناميز اؤز سودويله
ايچيرير روحوموزا بو ديلده گيله – گيله.
بو ديل بيزيم روحوموز، عشقيميز، جانيميزدير،
بو ديل بير- بيريميزله عهدي- پئيمانيميزدير.
بو ديل تانيتميش بيزه بو دونيادا هر شئيي،
بو ديل اجداديميزين بيزه ميراث وئرديگي
قييمتلي خزينه دير…اونو گؤزلريميز تک
قورويوب، نسيللره بيز ده هديه وئرک.
بيزيم اوجا داغلارين سونسوز عظمتيندن،
ياتاغينا سيغمايان چايلارين حيددتيندن،
بو تورپاقدان، بو يئردن،
ائلين باغريندان قوپان يانيقلي نغمه لردن،
گوللرين رنگلريندن، چيچکلرين ايگيندن،
ميل دوزونون، موغانين سونسوز گئنيشليگيندن،
آغ ساچلي بابالارين عقليندن، کاماليندان،
دوشمن اوستونه جومان او قيراتين ناليندان
قوپان سسدن ياراندين.
سن خالقيمين آلديغي ايلک نفسدن ياراندين.
آنا ديليم، سنده دير خالقين عقلي، حيکمتي،
عرب اوغلو مجنونون دردي سنده ديل آچميش.
اورکلره يول آچان فوضولي نين صنعتي،
ائي ديليم، قودرتينله دونيالارا يول آچميش.
سنده منيم خالقيمين قهرمانليقلا دولو
تاريخي واراقلانير،
سنده نئچه مين ايلليک منيم مدنيتيم،
شان- شؤهرتيم ساخلانير.
منيم آديم- سانيمسان،
ناموسوم، ويجدانيمسان!
بو ديل تانيتميش بيزه بو دونيادا هر شئيي،
بو ديل اجداديميزين بيزه قويوب گئتديگي
ان قييمتلي ميراثدير، اونو گؤزلريميز تک
قورويوب، نسيللره بيز ده هديه وئرک!
ائي اؤز دوغما ديلينده دانيشماغي آر بيلن
فاسونلو ادابازلار،
قلبينيزي اوخشامير قوشمالار، تئللي سازلار.
بونلار قوي منيم اولسون،
آنجاق وطن چؤرگي،
بير ده آنا اورگي.
سيزلره قنيم اولسون.

سو دئيبدير منه اولده آنام آب كي يوخ
يوخو اويره تدي اوشاقليقدا منه خواب كي يوخ
ايلك دفعه كي چوره ك وئردي منه نان دئمه دي
اوليندن منه دوزدانه نمكدان دئمه دي
آنام اختر دئمييبدير منه اولدوز دئيب او
سو دوناندا د ئمييب يخدي بالا بوز دئيب او
ال دئيب، دست دئمييب برف دئمييب قاردئيب او
منه هئچ وقت بيا سويله مييب گل دئيب او
ياخشي خاطيرلاييرام يازگوني آخشام چاغيلار
باغچانين گون چيخانيندا كي ايليق گون ياييلار
او دئيردي كي گل باشيوي دارييم اي نازلي بالام
گلمه سن گر باجيوين آستاجا زولفين دارارام
اودئمه زدي كي((بياشانه زنم بر سر تو))
(( گر نيايي بزنم شانه سر خواهر تو))
بلي قارداش داش ياغسادا گويدن سن اوسان منده بويام
وارسنين باشقا آنان واردي منيم باشقا آنام
اوزومه مخصوص اولان باشقا ائليم واردي منيم
ائليمه مخصوص اولان باشقا ديليم واردي منيم
ايسته سن يولداش اولاق بير ياشيياق بيرليك ائده ك
وئريبن قول قولا بيريولدا گئده ك
اولاً اوزگه كولكلرله گره ك آخميياسان
ثانياً ائليمه ، وارليغيما خور باخميياسان
ايسته سن زور دئيه سن، ملتيمي خوارائده سن
گون گئده ر، صفحه چونر مجبور اولارسان گئده سن

[پیمان هادی فرکوش]

منیم آی غملی دیلیم

منيم آي غملي ديليم !
درده بورونموش
سنه چوخ دردلي سؤزوم وار
سنه ايللر بوْيو قان آغلاماغا بيل كي گؤزوم وار
داخي دوستاقلي گؤنول ايچره كؤزوم وار
سن آتامين ديلي‏سن ، هم ده آنامين
ائليمين ، ميللتيمين ، كيمليييمين
بايراغي سَنسَه ن
تؤركلويون شانلي نيشاني
اُولاماز نازلي ديليم من سني آتام
اؤزگه ‏لر ديلينه ، ياد ائللرينه من سني ساتام
سني آلداتماييرام
سني ايچدن سئويره‏ م
سن اگر سولغون اولاسان ، سولاسان
گؤزلريم گؤز ياشيني دالغالارام
ظولمه قارشي آخارام
كؤزه ‏ره ‏ن گؤكسوم اوديله ياخارام
ظولمه سوْن نوقطه‏ سيني قويمالييام
سنه من آند ايچَه ره ‏م
آخي تورك'ون توْرونو
آنا "تومروس" قيزييام
آي منيم غملي ديليم !
درده بورونموش
سنه من آند ايچه ره ‏م
سنه من آند ايچه ره ‏م

[پیمان هادی فرکوش]

باشئمدا سوئداسان آرزئسان گؤروم

سن منیم دیلییم هم آرخام ائلیم

بوراخماز اللریم توتوب اتگین

سنسیز من سوزلری بس کیمه دئییم

جانئمدا قانئمسان ندور ایستگین

حایاتئم آلگئنان، گوی سؤزوم دئییم

سؤروشما حالئمنان کؤنوش سؤدیگین

هئچ دئمم یؤلوندا سئنسادا بلییم

داغلارون داشلارون بنزدور نگین

سنسیز من یاشامام، گؤی اؤلوم گئدیم

ستارخان، باقئرخان، قهرمان بئیین

گئدسن سن، هارا دای من وطن دئییم

یاندئرور اؤرگیم سنین نیسگیلین

آرازدان گئچم من بس هارا گئدیم

قئزئل تک اؤزرکن چایون وار سنین

ایسته مه قورویا، گؤز یاشئم منیم

سهندون، ساوالان، داغلارون سنین

اؤنوتسام توپراغون، توپراغا گئدیم

کؤچرگن ائللرون واروندور یقین

توشسمده اوزاکدان گؤی قاچئم گلیم

داغلاردان، دره لر ، آشئر سیللرین

یازایدئم داشلاردا اورک سؤزلریم

جانئمدا حایاتئم سنین دور سنین

ای منیم آرزئلار ای منیم ائلیم

مدحوننان سؤرایا دئسم بیر سؤزین

لال اؤلسون دیلیمده، کؤر اؤلسون گؤزیم

توپراغون ساتانا، نیفرینین سنین

بیر قریش توپراغون جانئمدور منیم

قزویننن بویانا مولکوندیر سنین

سؤزلریم، گورتارئم، سن دئسون سؤنیم

جانئمئز یولوندا قوربانین سنین

چوخ یاشا، ای منیم گوزلیم، آذر وطنیم

[پیمان هادی فرکوش]

پايان